NBA 場邊記者 Craig Sager 經歷咗接近2年同骨髓性白血病嘅搏鬥之後，喺香港時間昨晨病逝，終年65歲。 喺30年嘅NBA場邊採訪生涯中，Craig 以色彩奪目嘅西裝衣著聞名；佢同時亦都係圈中多位傳奇、球星、教練等嘅良師益友。
NBA Inside 節錄咗NBA圈中對Craig Sager逝世嘅反應，亦換嚟巴克利、Shaq、KG、Chris Webber、Kenny Smith分享佢哋對Craig 嘅回憶。另外韋迪、ESPN同T-Mac 亦有分享自己嘅感受。
Craig Sager 喺NBA 採訪生涯中有好多有趣嘅時刻，但相信唔少人都會好似片段中最後一段 2014年Coach Pop 普波域治被為病父上場嘅Craig Sager jr.採訪時所講嘅一番說話咁諗。
最後，大家一齊回顧下Craig Sager 多姿多彩嘅西裝。
相信所有人都一定經歷過買嘢俾錢但收銀大排長龍嘅苦況。喺外國某啲大型超市就早已經有自助收銀機，顧客自己掃barcode再透過現金/信用咭付款，比傳統付款方式快好多；不過當多人同時付款時，就算係有自助收銀機幫手都仍然會需要排一段時間隊。 但係可能喺不久嘅將來就此情不再…
事因Amazon 將會喺下年年初營運全新型式嘅全自助超市 Amazon GO，係全世界最新最先進嘅超市。顧客只要喺進入Amazon GO時打開Amazon GO嘅應用程式，讓閘機掃描用戶嘅QR Code，之後就可以入內自由選購貨品。超市利用多種科技，當顧客將呢啲貨品放入購物袋時就會同步到應用程式中嘅購物籃；顧客選購完畢之後唔需要再排隊畀錢就可以直接走出超市大門，而帳單就會由顧客嘅Amazon帳戶中扣除金額。
位於西雅圖嘅首間Amazon Go超市已經確認咗會喺2017年初投入服務，睇嚟將會成為當地另一個另類景點。
香港前排就發生咗單好神秘嘅山頭劫金條案，美國紐約近日就發生一宗神奇嘅偷金案！
話說喺紐約西48街街頭有日停泊咗一輛貨車，車上載有大量黃金，但負責運送同看管嘅兩位職員竟然打開咗個車尾之後就企喺路邊無理到啲貨物。呢個時候有位路人甲經過時發現路邊竟然有咁貴重嘅嘢無人看管，（一定係出於好心想幫忙暫時託管，除非唔係），所以就喺光天化日之下、鬧市街頭之上隨手抬走車上一桶價值160萬美元嘅金箔。更神奇之處係呢位「神偷」抬走桶金嘅時候喺正兩位負責嘅職員面前走過都無被發現，無非佢都識用「你睇我唔到」呢招？！ 不過都辛苦呢位「神偷」嗱，因為桶金都有成86磅咁重，難怪佢抬咗幾條街之後就要放低桶金喺路面稍作休息！
正所謂無片無真相，呢單劇情仲神奇過CCTVB劇集嘅事件整個過程都被街邊嘅閉路電視影低咗；而紐約警方亦都正在努力緝捕呢位神偷歸案。
日本品牌Journal Standatd 早前發佈咗今年秋冬季嘅lookbook。今次嘅lookbook套裝都係由多件簡單又易襯嘅部件配搭而成，充滿層次感，甚至被多位時尚blogger及時裝雜誌喻為layering 教材。系列較著重強調服裝中嘅「外套」一環，例如有JS自家旗下子品牌J.S Homestead 嘅軍裝風Parka 以及 哥本哈根品牌Andersen-Andersen嘅針織品。除此以外，lookbook中值得留意嘅亦都有意大利品牌Vigano 嘅修身踞喀褲等。整體上，成個collection lookbook 利用layering嘅技巧就為較平淡熟悉嘅服裝帶嚟一點別出嘅新意，絕對係今個秋冬必學嘅技巧。
Lookbook 部分嘅部件已經喺Journal Standard 嘅線上商店開始發售。
塞車時，你哋會做啲咩解悶？聽歌？碌手機？睇下周邊廣告？ 但喺印尼雅加達就有一位巴打駭入電子廣告板度播AV。
呢位24歲任職IT嘅巴打喺10月嘅某個工作日因為放工正值交通繁忙時間，塞咗喺市中心嘅路段。可能佢太過想睇AV，慾火焚身等唔切返到先睇，所以就決定即場睇AV；仲要唔知係唔係嫌個手機螢幕唔夠大睇得唔過癮，佢仲駭入埋路邊電子廣告板度與眾同樂，認真開心Share!
據消息指，佢睇嘅仲要有著強勁電音節拍作intro嘅東京熱作品，果然係行家呀！不過好景不常，個「公共AV播映空間」只係維持咗10分鐘就被切斷咗電力。而位巴打亦都喺翌日被印尼警方以「於公眾地方展示成人影片及展示有不雅畫面之影片」嘅罪名被捕，面臨最高12年監禁嘅刑罰。
其實喺印尼，鹹網係被政府封鎖，而上鹹網亦都係犯法嘅；所以我哋大家都要好好珍惜而家有得上鹹網嘅機會，有得睇就睇多啲喇！
Hugh Jackman 前幾年就曾經講過，「Logan」係佢最後一次扮演狼人嘅電影，而呢套告別作亦都喺噚晚正式發佈預告片。
今次係Hugh Jackman第十次，亦係最後一次喺X-Men電影系列中演出。「Logan」劇情係取自外傳漫畫 Old Man Logan 同多部X-Men系列漫畫嘅設定混合而成；講述喺The Reavers同 Mr. Sinister嘅捕殺之下，X-Men以及絕大部份mutants都已經死去或者失去異能，Wolverine隨著自我復原嘅異能逐漸失去亦開始衰老，Charles Xavier亦都因年老患上腦退化影響記憶力。佢哋遇上Wolverine嘅女複製人X-23 (若果想了解多啲X-23嘅朋友請參閱前文Marvel 近年7個多元化舊⻆新人) ，並且希望藉X-23嘅幫助抵抗全能嘅Mr.Sinister…
對漫畫版X-Men有認真嘅朋友或者會再一次對今次電影嘅設定感到唔滿意，但係…作為一個X-Men粉絲，就算過往16年嚟嘅電影作品有幾差都好，你不得不承認Hugh Jackman所扮演嘅狼人已成為一個經典。呢個經典最後一次出場…你唔係唔睇呀？！
Logan將會喺下年3月3日美國上映，至於香港嘅上映日期暫時都仲未落實，但估計都會係同一日。到時大家一齊入戲院送別Hugh Jackman版Wolverine 啦！
你覺得自己85歲嘅時候可以做到啲咩？對於Ed Whitlock嚟講，85歲係佢人生另一個高峰。事關Ed 喺日前嘅多倫多馬拉松中跑出破同年齡組別嘅世界紀錄，成為世界紀錄保持者。
Ed 原本並唔係跑步愛好者，直到有康復治療師同佢講跑步有助紓緩佢雙膝嘅關節炎，Ed先展開佢嘅跑步生涯。不過無論係年齡定關節炎，都無阻呢位「傷膝老人」以3小時56分38秒完成全馬拉松賽事，比舊紀錄快超過半個鐘！
喺2010年嘅一個專訪中，Ed 就透露佢唔會遵從任何典型嘅跑步指引，唔會有物理治療、浸冰浴、按摩、節奏跑、心跳監察等。佢解釋：「我唔特別反對任何指引，但我唔會特別有野心或者唔會特別有計劃咁去做一啲我會認真做嘅事。」
保田道世 － 你可能會對佢個名好陌生，但佢嘅作品你一定有睇過：「風之谷」、「天空之城」、「龍貓」 、「再見螢火蟲」、「魔女宅急便」、「歲月的童話」、「幽靈公主」、「千與千尋」、「哈爾移動城堡」、「崖上的波兒」、「風起了」… 唔只係宮崎駿嘅作品，只要係吉卜力工作室出品嘅經典作品，都會喺credit度見到佢嘅名。
被宮崎駿譽為長期戰友嘅保田道世早喺1958年已經進入東映進行配色嘅工作，係高畑勳同宮崎駿嘅師姐，由1968年開始就同高畑勳、宮崎駿兩人合作。雖然72年開始三人隸屬於唔同公司，但都喺「友愛的天空」同「高立的未來世界」等多部動畫作品中合作；更於1985年一齊加入新成立嘅吉卜力工作室。
自此之後，基本上所有吉卜力嘅出品都係由保田道世作色彩設定。佢原本喺「崖上的波兒」之後就已經退休，但受到宮崎駿嘅極力邀請下，都喺「酵母君與雞蛋公主」、「尋寶」同宮崎駿最後一部長篇動畫電影「風起了」中重出江湖。
由下圖就可以見到保田道世用色嘅高超技術；可惜呢位一代大師喺10月5日因病逝世，終年77歲。
見到Jeremy Clarkson、James May 同 Richard Hammond 三條友又聚埋一齊，你一定會以為係Top Gear 呢？非也非也，其實呢個係Amazon Prime 出品嘅 The Grand Tour。
事源自Jeremy Clarkson 畀 BBC 炒作之後，網民一直要求佢哋三人幫復出主持節目，Amazon 有見及此就乘機開個新嘅汽車節目搵佢哋做番主持，滿足網民需求。日前呢個新節目就喺網上發佈首個預告片；雖然節目叫做The Grand Tour，不過明顯只係借屍還魂，感覺上內容同風格都係不折不扣嘅Top Gear。The Grand Tour 將會由11月18日起每周線上付費播放。
相信宮崎駿筆下嘅龍貓大家都好熟悉，亦應該俘虜咗唔少人嘅心。不過唔知係唔係因為潮流興健康，所以連不嬲都咁受歡迎嘅佢都要開始做運動Keep Fit。
澳洲設計師 CL Terry 就好用心咁整咗多幅龍貓做運動時嘅GIF圖，當中包括跳繩、呼拉圈、做瑜伽等等；見到肥騰騰嘅龍貓做運動時啲肉戥下戥下咁，真係好得意架！
其實CL Terry除咗整運動主題嘅龍貓GIF圖之外，佢仲整咗好多唔同嘅主題GIF圖。若果有興趣想睇多啲 CL Terry 嘅作品嘅話可以上去佢嘅個人網站架！
連龍貓都做運動，你仲坐喺度唔郁？！
空墟 